Plantun de Prouvènço

Pèr coumpara dos planto d'encò nostre

Carex canescens & Arundo donax

Queirello(-blanquinouso)

Carex canescens

Cyperaceae

Àutri noum : Moutouso, Sagneto.

Nom en français : Laiche blanchâtre.

Descripcioun :
La queirello-blanquinouso trachis en mato dins li palun de mountagno sus siliço. Es uno planto pulèu raro au nostro emai s'atrobe un pau d'en pertout en deforo. Sa cambo, en triangle e rufo en aut, porto de tres à vuech espigo roundinello longo de 5 à 12 mm. Fai de lòngui fueio de 2 à 3 mm de larg.

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : 20 à 50(70) cm
Fueio : costo paralèlo
Tipe bioulougico : Emicriptoufite
Cicle bioulougico : Planto renadivo

Gènre : Carex
Famiho : Cyperaceae

Ordre : Poales

Coulour de la flour : Verdo
Petalo : ges
Ø (o loungour) enflourejado : 30 à 50 mm
Flourido : Printèms - Estiéu

Sòu : Si
Autour basso e auto : 0 à 2300 m
Aparado : Noun
Mai à juliet

Liò : Palun tourbous
Estànci : Mountagnard à Subaupen
Couroulougi : Subrecousmoupoulito
Ref. sc. : Carex canescens L., 1753

Cano

Arundo donax

Poaceae Graminaceae

Autre noum : Canié.

Noms en français : Canne de Provence, Roseau à quenouilles.

Descripcioun :
La cano que ié dison "de Prouvènço" es uno plano bèn couneigudo emé si grando e gròssi tijo lignouso d'enviroun 3,5 cm de diamètre, si long rizoumo espès e si fueio verdalo de 2 à 5 cm de larg.

Usanço :
La cano que nous vèn dóu cèntre de l'Asìo, fuguè proun plantado pèr proutegi li culturo dóu mistral. Nòstis àvi se n'en servien pèr gaubeja mant'uno besougno : pèr eisèmple pèr apara li det dóu tai dóu voulame (li dedau) o enca pèr acroucha lou calèu (la moco). Lou rizoumo èi manjadis (li fueio peréu, mai soun proun amaro) cue (rousti o bouli) o adouba en farino pièi mesclado à d'autro. Emai èro pas gaire emplegado coume planto vertuouso, aro d'ùni prouprieta soun estado troubado coume dins la dessensibilisacioun pèr l'alergìo.